عمرو سعد موجهًا نصائح للشباب: بكيت مع أول أفيش اترفع لي على السينما .. صدق حلمك حتى لو "تيك توكر"

نرمين حلمي | فى سينما وتلفزيون

ندوة عمرو سعد بمهرجان القاهرة السينمائي

الخميس , 21 نوفمبر 2024 - 19:11 | اخر تحديث: الخميس , 21 نوفمبر 2024 - 19:11

يستضيف مهرجان القاهرة السينمائي الدولي بدورته الـ45، جلسة نقاش حوارية مع النجم عمرو سعد، يديرها الناقد رامي عبد الرازق، ضمن فعاليات أيام القاهرة لصناعة السينما.

يتحدث النجم عمرو سعد، مساء اليوم الخميس داخل المسرح المكشوف بدار الأوبرا المصرية، عن تجربته الملهمة في التمثيل والصعوبات التي واجهته بمشواره المهني، موجهًا نصائح للشباب لتحقيق أحلامهم في مجال التمثيل أو خارجه.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

ندوة عمرو سعد بمهرجان القاهرة السينمائي

يقول عمرو سعد: "إوعى تشك في قدراتك أبدًا، متقولش الزمن هدني، إنت اللي تهده وتحقق نفسك"، مسترجعًا ذكرياته مع السينما وسبب حبه والشغف بها، واصفًا: "عشان تحقق ذاتك صعب، والسينما ممكن تسمح بده عكس الواقع، وبالتالي هتلاقي ممثل خريج كلية حقوق وهكذا، يعني الطاقات الرهيبة للشباب مش موجودة في السيستم يظبطها صح".

يتابع: "لكن لما بنشوف البطل في السينما بيحقق حلمه نتفاعل معاه ونفصل عن الواقع الصعب ونحقق طموحاتنا معاه
وده بيتحقق معايا خاصة إني أنتمي لأسرة بسيطة وأبويا وأمي كانوا بيحبوا يتفرجوا على دراما وسينما رغم صعوبة توفير سعر التذكرة لأنها بتثير نقاش ومتعة غير عادية".

طالع أيضا - ياسمين رئيس تعرض على صديقتها دينا الشربيني الزواج من زوجها كريم محمود عبد العزيز في الإعلان الأول لـ"الهنا اللي أنا فيه"

ندوة عمرو سعد بمهرجان القاهرة السينمائي

يضيف: "الأهم مش الموهبة لكن الإصرار على تحقيق الذات وقرارك تتمسك به، مفيش حد معندوش حلم في العالم، لكن إصرارك تكمل في قرارك، مثلاً في ناس عايزة تبقى مؤثرة في المجتمع، منهم بقى مشاهير ومنهم بقى مؤذن في الجامع ومنهم تيك توكرز ومنهم بقى ممثلين، في شغف للإصلاح لازم يكون موجود وتأثر في الناس وتسمعك".

يستطرد مستشهدًا بتجربته: "أنا برسم وأمثل وشخص muktitask حتى إني جربت أغني ولأول مرة اعترف بتجربة الغناء، عملت حاجات كتير لحد ما عرفت إن تأثيري لما أكون ممثل، رغم إني سقطت في معهد التمثيل لما قررت أمثل، لكن مفيش حاجة تقدر تمنعك عن حلمك إلا نفسك، لازم تشتغل جامد جدًا ومصدق في نفسك، ولا مرة شكيت في موهبتي وحلمي ومتأكد إني هكون بطل سينما في بلد كبير زي مصر".

ندوة عمرو سعد بمهرجان القاهرة السينمائي

يصف: "كنت بعدي على سينما مترو مرورًا بوسط البلد، كنت أبص على الأفيش وأقول في يوم من الأيام هوصل هنا، ويشاء السميع العليم أن أول أفيش يتعمل لعمرو سعد يكون عند سينما "مترو" وأنا بكيت أول ما حصل كده، بكاء اللعيب اللي جاب جون بعد فترة طويلة، حسيت إني كنت صح ولازم أكمل في طريقي، عايز أقول للشباب مفيش قيود في المجتمع، وإثق في نفسك وزود مساحة استحقاقك بنفسك".

وعن طرقه للتغلب على الإحباطات وتكملة مسيرته منذ بداياته، يقول: "الرفض واجهته لإني مثلاً مروحتش أشوف النتيجة في المعهد عشان أروح المرحلة اللي بعدها، لاقتني مش مكتوب اسمي في المرحلة اللي بعدها ففهمت إني منجحتش، فوقفت قولت خسروني، حِس دايمًا إن المكان خسرك وإن إنت اللي تمنح قيمة للأشياء، وأنا جاي النهاردة أقابلكم مفكرتش هلبس إيه لأن انا اللي همنح القيمة للحاجة".

ندوة عمرو سعد بمهرجان القاهرة السينمائي

تشهد الدورة الخامسة والأربعين من مهرجان القاهرة السينمائي، مشاركة 190 فيلمًا من 72 دولة بالإضافة لحلقتين تلفزيونتين، بينما تشمل الفعاليات 16 عرضًا للسجادة الحمراء، و37 عرضًا عالميًا أول، و8 عروض دولية أولى، و119 عرضًا لمنطقة الشرق الأوسط وأفريقيا.

ندوة عمرو سعد بمهرجان القاهرة السينمائي

وكرم المهرجان خلال حفل الافتتاح ثلاث شخصيات سينمائية بارزة تضم المخرج المصري يسري نصر الله، الذي منح جائزة الهرم الذهبي التقديرية لإنجاز العمر، تقديرًا لمسيرته الفنية الحافلة، والنجم أحمد عز، بمنحه جائزة فاتن حمامة للتميز، كما تم تكريم المخرج البوسني دانيس تانوفيتش، الذي يترأس لجنة تحكيم المسابقة الدولية.