كندة علوش تتحدث عن صورتها الشهيرة مع عمرو يوسف: مكنتش قادرة امشي فندهت له وسندت عليه ... التعليقات على وزني وجعتني

مي جودة | فى حياة المشاهير

عمرو يوسف وكندة علوش

الأحد , 23 يونيو 2024 - 02:06 | اخر تحديث: الأحد , 23 يونيو 2024 - 03:06

تحدثت النجمة كندة علوش بالتفصيل عن إصابتها بسرطان الثدي، ورحلة علاجها التي بدأت منذ عام تقريبا، ودور زوجها النجم عمرو يوسف في دعمها.

قالت كندة علوش: "عمرو يوسف كان داعم كبير لي فترة مرضي، هو أصلا شخص إيجابي جدا، وهو بشكل عام مابيستسلمش للحزن، ومابيسبش نفسه للخوف والقلق والحزن، وكان ماسك بإيدي كل ما يشوفني هقرب يرجعني عشان ما أروحش في السكة دي"، حسب تصريحاتها مع منى الشاذلي.

كندة علوش وعمرو يوسف

وتابعت كندة علوش: عمرو كان معايا في كل رحلات العلاج والجلسات وفي كل حاجة، وفي الكلام لما نيجي نتكلم، هو كان عايزني ابقى سعيدة، هو كان بيخفف عني نتفرج على فيلم دم خفيف، ولما يشوفني محتاجة اتكلم يسمعني، بس مايسبنيش استغرق في حالات الخوف أو الحزن، وجود شريك إيجابي وداعم وهو بطبيعته، لما بيكون عنده في الشغل مشاكل مابيرجعش البيت معه مشاكل، بيرجع بابتسامة ويقول لي أنا زي الفل، ربنا يخليه ويديمه، أنا كنت شخص أكثر حساسية وشخص ممكن يكون ميال للحزن، وأنا اتعلمت منه ازاي اتعامل مع الأزمات لو سميناها أزمات، وعلمني ازاي اتعامل بإيجابية ونشوف ربنا بعد الأزمة دي هيدينا حاجة حلوة.

وعن انتشار فيديو لها وهي تستند في أحضان زوجها على السجادة الحمراء في مهرجان فينيسيا، قالت: "كان قبل اكتشافي المرض، كنت رايحة المهرجان تعبانة من الولادة، كنت لسه والدة كريم بكم شهر، ورايحة لسه بالوزن الزائد من الولادة والتعب وتجربتي الصعبة، ومكنتش عايزة اسافر، بس كان فيلم (نزوح) اللي بحبه جدا، كان لنا الحظ أنه معروض فيه وهو مهرجان كبير، وقولت مش هسافر، وعمرو قال لي (أنتِ هبلة)، قولت له (هسيب ابني ازاي)، قال لي (لا هتروحي وهروح معك، ويومين بالضبط وهتشوفي ازاي السفرية دي هتفرق معاكِ)".

كندة علوش وعمرو يوسف

واضافت: العرض كان ساحر، والجمهور تواصل مع الفيلم بشكل رائع، وكنت ماشية على السجادة الحمراء تعبانة ومش قادرة ومش جاهزة، وعمرو حبيبي كان واقف ورا الناس بيصورني، فقولت له (تعالى اقف معايا)، وجيه، وبشكل طبيعي مش واخدة بالي خالص، ميلت كدة على صدره وغمضت عيني، وصحفي أحبه صور المشهد، ونزل الفيديو، وانتشر، كنت تعبانة وسندت على حد بحبه.

أما عن الانتقادات عن وزنها الزائد، قالت كندة علوش: "كنا في المصيف واتصورت عادي في عز مرحلة العلاج الكيماوي، اللي هو الواحد متنفخ وبشرته تعبانة وشعره خف، وكل الأعراض، الفترة دي كنت بحاول ماتصورش واتصورت، ولما نزلت الصورة وفيه مواقع وأاشخاص للأسف (شاهد كندة علوش بعد اكتسابها الوزن)، والتعليقات كانت هي أوحشت ليه وأهملت نفسها ليه، كان في تنمر حقيقي وكلام قاسي ومش لطيف، وفيه ناس لما الصورة انتشرت قالوا لي أحط الصورة وأقول أنا عندي كذا، قولت لهم لا أنا مش هخلي ناس بتتكلم بشكل وحش مش هخليهم يغيروا مسار حياتي ويهزوا ثقتي في نفسي وأغير رأيي، ومكنتش مبسوطة واتضايقت وأنا أصلا مكنتش مبسوطة بشكلي، ولسه عايزة اخس.

كندة علوش وعبد الباسط حمودة وعمرو يوسف

وأضافت: الموضوع دا علمني حاجة من ضمن الحاجات الكتير، منها نبطل نستسهل الحكم على الناس لأن مانعرفش ظروفهم ايه، احنا مانعرفش كل انسان فيه وراه إيه.

وكانت كندة علوش أعلنت إصابتها بسرطان الثدي بعد إنجابها لابنها الثاني كريم بتسعة أشهر.

اقرأ أيضا:

كندة علوش تكشف تفاصيل إصابتها بالسرطان: تلقيت الخبر بهدوء وشعري كله وقع

جيني تدافع عن شيرين عبد الوهاب: اللي يشوف مراته حالتها الصحية والفنية بتدهور كده يبقي سبب

محمد سعد يعود للسينما مع وائل إحسان بفيلم "دكتور عدوة"

رقص أميرة أديب وشقيقها على أنغام "فرتكة" (فيديو)

لا يفوتك: #نظرة_على_المشهد_الأخير قصة مـ..قتل نيازي مصطفى بطريقة سـ..ـا دية التحقيق مع 65 كومبارس وسر ظهور فاروق الفيشاوي في الصورة

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5