خاص هلا السعيد لـ"في الفن": مشهد موت "هبة" في "المداح" كان مرهق جدا وقعدت 4 ساعات أظبط حركة ضربة السكينة

نهال ناصر | فى سينما وتلفزيون

هلا السعيد

الإثنين , 25 مارس 2024 - 15:03 | اخر تحديث: الثلاثاء , 26 مارس 2024 - 09:03

قدمت الفنانة هلا السعيد مشهدا قويا خلال أحداث الحلقة الـ15 من الجزء الرابع من مسلسل "المداح: أسطورة العودة" الذي يحقق نجاحا كبيرا ويتفاعل الجمهور مع أحداثه.

في الحلقة يسيطر الجن "موت" على "هبة" أخت "صابر المداح" ويجعلها تقتل نفسها بعدما أعطاها سكينا، لتقوم بطعن نفسها عدة مرات، في واحد من المشاهد القوية بالمسلسل.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتواصل FilFan.com مع الفنانة هلا السعيد، لتحكي لنا عن كواليس المشهد، والتعاون مع حمادة هلال والترنيمة التي أصبح الجمهور يرددها.

نرشح لك: إلهام شاهين لـ"في الفن" عن حلاقة ابنة شقيقتها لشعرها كاملا في "إمبراطورية ميم": كانت مخبية عليا ووجعت قلبي عليها

في البداية تحدثنا عن كواليس مشهد موت "هبة"، فالمشهد الذي يراه الجمهور في دقائق قليلة يأخذ تصويره والتحضير له وقتا طويلا، وقالت هلا السعيد عن كواليس المشهد: "اتمرنت أنا وحمزة العيلي على المشهد كذا مرة عشان يظهر في النهاية بالشكل اللي ظهر بيه لأن "هبة" مقتلتش نفسها الجن كان هو المتحكم فيها فكنت مع حركة عينه بحرك إيدي، وكيس الدم المستخدم مكنش كيس دم عادي محطوط وبضربه ببساطة، وحتى السكينة ومسكتها وطريقة الضربة ليها ضغطة بطريقة معينة عشان يطلع الشكل طبيعي، قعدنا حوالي 4 ساعات عشان نظبط الحركة".

هلا السعيد من مشهد موت "هبة" في المداح

وتابعت: "المشهد اتصور من كذا زاوية فعيدنا التصوير كتير عشان ناخد كل زاوية وحدها، والدم مكنش بيطلع بسهولة من إيدي، وكنت كل شوية بروح أبدل هدومي وألبس تاني وأصور وأرجع أبدلها تاني، كان مشهد مرهق جدا".

View this post on Instagram

A post shared by FilFan.com (@filfan)

شخصية "هبة" مرت بتطورات كثيرة إلى أن وصلت لنهايتها بأن تقوم بقتل نفسها، وسألنا هلا السعيد عن الاختلاف في الشخصية في الجزء الرابع عن الأجزاء السابقة وقالت: "السنة دي كان صعب عليا أكتر من السنة اللي فاتت، السنة اللي فاتت شخصية "هبة" عملت كل حاجة كانت مجنونة وملبوسة وعندها مشاكل نفسية بسبب قتل مامتها وصدمة، كل حاجة صعبة ممكن ممثل يقدمها اتعملت، مكنتش عارفة هضيف إيه السنة دي، سألت المخرج أحمد سمير فرج أكتر من مرة إيه هيكون جديد السنة دي".

هلا السعيد حكت عن كواليس تحضير شخصية "هبة"

وتابعت هلا سعيد: "الموضوع السنة دي عن الذبذبات اللي بتسمعها "هبة" من خلال موسيقى فيديوهات "سميح الجلاد" فتحي عبد الوهاب، في موسيقى بيكون ليها ذبذبات محددة بتأثر على المخ، أنا مفيش حالة حصل معاها كده ومكنتش فاهمة لكن تخيلت أنها بتسمع حاجات وبتعمل همهمة ونغمة موسيقية خاصة بيها، وتخيلت "هبة" وهي بتسمع الموسيقى هيكون رد فعلها إيه هي زي ما تكون بتدخل جوا دواير سودا وبتسرح وبتحرك راسها وتلف في دواير، تخيلت شكل للشخصية في المشاهد اللي بيكون في تأثير عليها من الجن".

هلا السعيد

شخصية "هبة" ليست شخصية عادية وسهلة ما تعاني منه هو سيطرة الجن عليها، لذا التحضير لها لا بد أن يكون مختلفا، وقالت هلا السعيد عن هذا الأمر: "مشفتش حالة "ملبوسة" أو مسيطر عليها الجن، لكن في شخص أصحابي يعرفوه وبيقولوا عليه "المداح" هو شخص طيب جدا وبيحب يساعد أي حالة بيخرج الجن منها، قعدت معاه مرة واتكلمت معاه وقولتله أنا حاسه الموضوع يتعمل إزاي وهو قالي شكلهم بيبقى عامل إزاي، كنت بحس أن نظرة العين بتكون مختلفة والتشنجات اللي بتحصل للجسم، والصوت بيكون متغير، هو قالي على حاجات والمفروض كان في حالة كنت هحضر جلسة معاه لكن محصلش عشان كنت بدأت تصوير، والحمد لله لما عملت شخصية "هبة" كل التعليقات من ناس شافت حالات كده قالولي إني عملتها صح".

هلا السعيد

وصل مسلسل "المداح" للموسم الرابع ولا يزال الجمهور يشعر بالخوف ويتسأل عن حال الفنانين أثناء التصوير، لذا سألنا هلا السعيد إن كانت تشعر بالخوف أيضا، وقالت: "إحنا إتعودنا مبقناش بنخاف، أول موسم كان مرعب بالنسبة ليا، أي حد جديد هيدخل على الموضوع هيخاف، في الجزء التاني مكنش لسه حصل لشخصية "هبة" حاجة كبيرة، لكن في الجزء التالت "هبة" بقت "ملبوسة" وكان في مشاهد مرهقة وكتب بنهار فيها، في مشهد في الجزء التالت كان المفروض "هبة" قاعدة وسادة ودنها وبتسمع أصوات وبتعيط، حتى بعد ما وقفنا تصوير فضلت أعيط وكل الناس حاولوا يهدوني ويقروا قرآن".

ومنذ بداية شهر رمضان 2024 وترنيمة مسلسل "المداح" هي الأكثر انتشارا عبر مواقع التواصل الاجتماعي مع كلماتها، وبدأ الجمهور يشعر أنه يقرأ تعاويذ، وحكت هلا السعيد عن موقف مضحك مع أصدقائها عن هذا الأمر قائلة: "أصحابي مش بيحبوا يسمعوا التتر، وبيفضلوا يقولوا ممكن يكون فيها حاجات زي بعض تعليقات الجمهور، لكن إحنا هدفنا في المسلسل إننا نوعي الناس إزاي هنبقى بنأذيهم، و"المداح" كل سنة بيكون فيه حاجة تريند زي "ابننا جيه" في الموسم التالت، الناس بتحب الحاجات دي وبتستناها".

وتتعاون هلا السعيد مع حمادة هلال للعام الثالث على التوالي وقالت عن كواليس العمل معه: "حمادة هلال شخص جميل ومريح جدا في الشغل وجدع ومتواضع جدا، بيكون خايف على كل الناس وبيراضيهم، الناس كلها بتحس أن نجاح المسلسل عشانه وعشان طيبة قلبه، القبول عنده عالي، وهو في الكواليس بيضحكنا ولو حد لسه جديد في المسلسل بيرحب بيه ويستقبله استقبال كبير".

هلا السعيد وحمادة هلال

وهذا العام انضم عدد من النجوم للمسلسل منهم الفنان فتحي عبد الوهاب "سميح الجلاد" مصدر الرعب في المسلسل، لكن في الكواليس الأمر مختلف تماما كما قالت هلا السعيد: "أنا بدخل اللوكيشن أسمع صوت ضحكة فتحي عبد الوهاب طول الوقت بيضحك كل الناس وبيهزر".

هلا السعيد وفتحي عبد الوهاب

كما أشادت هلا السعيد بالمجهود الكبير الذي يقدمه المخرج أحمد سمير فرج وقالت عنه: "أستاذ أحمد سمير فرج ليه لمساته مع الممثل ومريح جدا في الشغل وبيطلع من الممثل أحسن حاجة بهدوء، فالممثل بيكون مرتاح في التعامل معاه، مسلسل المداح مش سهل ومش دور ممكن يتعرض على الممثل كتير وبيحتاج مخرج شاطر وفاهم وأستاذ أحمد سمير فرج كده وبيفرق جدا في أداء الممثل وعارف عايز إيه بالظبط من كل واحد".

كما عبرت هلا السعيد عن سعادتها بالتعاون مع دياب حمزة العيلي وأشادت بأدائهم المختلف في المسلسل.

وعن جديدها أوضحت هلا السعيد إنها عرض عليها في رمضان 2024 أعمال كثيرة لكنها فضلت أن تختار بعناية الدور الذي تظهر به، حتى الفترة القادمة هي تركز على اختيار أدوار تكون راضية عنها بنسبة 100%.

اقرأ أيضا:

بسمة بوسيل: حلم رجوعي لتامر حسني هيتحقق

حورية فرغلي تكشف كواليس رفضها مليوني دولار كمهر زواج: أحلى مني ومش عارفة راجل ولا بنت

بسمة بوسيل: طلاقي من تامر حسني كان صدمة ... وجريت على الكعبة علشان أقرب من ربنا

5 أسباب لنجاح مسلسل "أشغال شقة"

طالع أيضا - نظرة على المشهد الأخير .. قصة مقتل سينمائي شهير بطريقة سادية والتحقيق مع 65 كومبارس.. ومفاجآت عديدة في تحقيقات النيابة

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5