خاص "إعلانات رمضان" ... واللي ما يشتري يتفرج

محمد عبد الخالق في سينما وتلفزيون

شيرين وياسمين وعمرو ... نجوم إعلانات رمضان

السبت , 9 أبريل 2022 - 13:04 | اخر تحديث: السبت , 9 أبريل 2022 - 13:04

الإعلانات شريك أساسي في الاحتفالية الرمضانية، مع المسلسلات والبرامج والفوازير، ننتظرها كل عام لنشاهد نجومنا المحببوبين، ونستمع إلى أغاني جميلة، وأفكار مبتكرة في التسويق.

وجميعنا يعرف أن الهدف الأول من الإعلانات في شهر رمضان ليس التسويق أو رفع المبيعات، بقدر ترسيخ اسم "البراند" في أذهان أكبر كم من المشاهدين الذين يحققون في هذا الشهر الكريم نسبة مشاهدة لا تتكرر على مدار العام.

باختصار ومن الآخر، فلسفة الإعلانات في رمضان تتلخص في المثل الشعبي القائل: "اللي ما يشتري يتفرج"، وحتى لومش هنشتري ... تعالوا بينا نتفرج.

"وي" ياسمين عبد العزيز وكريم محمود عبد العزيز

‎ ‎صورة‎ ‎

خفة دم الثنائي وضعت الإعلان في مكان تاني، ينتظره المشاهدون كإنهم ينتظرون مسلسلهم المفضل ... وإزاي طنط؟

"57357" نوال الزغبي

‎ ‎صورة‎ ‎

"ألفين سلامة" لحن مؤثر وكلمات سهلة، "ألفين تحية" لكل صناع الإعلان اللي عملوا حاجة من القلب فوصلت بسرعة للقلب.

"بنك مصر" شيرين

شيرين عبد الوهاب في إعلان "بنك مصر"

حذف مقدمة الإعلان أنقذه وأنقذنا، ورغم إن الناس كانت ماشية في البيوت أول يومين في رمضان تشتم بعض ... صوت شيرين ساحر وإحساسها هيفضل هو المنتصر.

"البريد المصري" عمرو دياب

عمرو دياب في إعلان "البريد المصري"

الإعلان اللي بدل ما يروّج للمعلن جاب له الكلام ... كان عليكم من ده بكام؟ ... المهم إن "الهضبة" الحمد لله انتصر في صراعة على فردة الكاوتش.

"أورانج" منى ودينا ونيللي

‎ ‎صورة‎ ‎

بلاش سعاد حسني يا منى ... بلاش سعاد حسني يا منى ... بلاش سعاد حسني يا منى ... بلاش سعاد حسني يا جماعة.

"مدينتي" كريم عبد العزيز

‎ ‎صورة‎ ‎

كتير قوي كده يا كريم ... كده أوفر بجد أوفر ... أبوس اديك اديني فرصة أشوف مسلسل.

"اتصالات" أحمد عز وكارمن بصيبص

‎ ‎صورة‎ ‎

إعلان خفيف على الروح والكيميا بينكم باينة جدا، و"العارف" هياخد باله إن كل ده من فيلم واحد بس.

"فودافون" عمرو دياب

‎ ‎صورة‎ ‎

اللي بينا حياة وأكتر ... واللي بينا وبين "الهضبة" عمر وأجمل ذكريات ... أغنية جميلة وصوته بيمس قلوبنا، وكإننا ما عداش علينا 30 سنة بنسمعه.

"رمضان في جيلنا" مجموعة الفنانين

‎ ‎صورة‎ ‎

بنتبسط بمجرد ما نشوف حميد الشاعري وهشام عباس ونجوم التسعينيات، حتى لو ما اتكلموش .. بس "النوستالجيا" مش كل مرة تصيب ... وبعدين "بكار" مين اللي جيلك يا أستاذ سقا؟!